ವಿಜಯ ದರ್ಪಣ ನ್ಯೂಸ್….
ಪ್ರಭಾತ್ ಆರ್ಟ್ಸ್ ಇಂಟರ್ನ್ಯಾಷನಲ್ ವತಿಯಿಂದ ಭರತನಾಟ್ಯ ಮತ್ತು ಕಥಕ್ ತ್ರಯಿ ನೃತ್ಯೋತ್ಸವ
ಬೆಂಗಳೂರು: ಪ್ರಭಾತ್ ಆರ್ಟ್ಸ್ ಇಂಟರ್ನ್ಯಾಷನಲ್ ವತಿಯಿಂದ ಆಯೋಜಿಸಲಾದ “III” ಶಾಸ್ತ್ರೀಯ ನೃತ್ಯ ಕಾರ್ಯಕ್ರಮವು ಭರತನಾಟ್ಯ ಮತ್ತು ಕಥಕ್ ಎಂಬ ಎರಡು ಶ್ರೇಷ್ಠ ಭಾರತೀಯ ನೃತ್ಯಪ್ರಕಾರಗಳ ತ್ರಯಿ (Trio) ವಿನ್ಯಾಸಗಳ ಮೂಲಕ ರಸಿಕರಿಗೆ ವಿಶಿಷ್ಟ ಕಲಾನುಭವವನ್ನು ನೀಡಿತು.
ಸಮರ್ಪಕವಾಗಿ ವಿನ್ಯಾಸಗೊಳಿಸಲಾದ ಈ ಕಾರ್ಯಕ್ರಮವು ನೃತ್ಯ, ಸಂಗೀತ, ಸಾಹಿತ್ಯ ಮತ್ತು ಭಾವಾಭಿವ್ಯಕ್ತಿಯ ಸೊಬಗನ್ನು ಒಂದೇ ವೇದಿಕೆಯಲ್ಲಿ ಅನಾವರಣಗೊಳಿಸಿತು.
ಕಾರ್ಯಕ್ರಮವು ಕಿರಿಯ ವಿದ್ಯಾರ್ಥಿಗಳ ಪ್ರಥಮ ಸಾರ್ವಜನಿಕ ಪ್ರದರ್ಶನವಾದ “ನಟೇಶ ಕೌತ್ವಂ”ನೊಂದಿಗೆ ಆರಂಭವಾಯಿತು. ಆತ್ಮವಿಶ್ವಾಸ ಹಾಗೂ ಉತ್ಸಾಹದಿಂದ ಕೂಡಿದ ಅವರ ಪ್ರದರ್ಶನವು ಸಭಿಕರ ಮೆಚ್ಚುಗೆಗೆ ಪಾತ್ರವಾಗಿ ಕಾರ್ಯಕ್ರಮಕ್ಕೆ ಶುಭಾರಂಭ ನೀಡಿತು.
ತ್ರಯಿ ಸರಣಿಯು ಕಥಕ್ ಶೈಲಿಯಲ್ಲಿ ಶ್ರೀ ಶಿವನನ್ನು ವರ್ಣಿಸುವ ಉತ್ಸಾಹಭರಿತ ನೃತ್ಯ ರೂಪಕದೊಂದಿಗೆ ಆರಂಭವಾಯಿತು. ಶಿವತತ್ತ್ವದ ವೈಭವವನ್ನು ಲಯಬದ್ಧ ಹೆಜ್ಜೆಗಳು, ಸುಂದರ ಭಾವಾಭಿನಯ ಮತ್ತು ಕಥನ ಶೈಲಿಯ ಮೂಲಕ ಮನೋಜ್ಞವಾಗಿ ಮೂಡಿಸಲಾಯಿತು. ಇದಾದ ಬಳಿಕ ಭರತನಾಟ್ಯ ಶೈಲಿಯ ಪುಷ್ಪಾಂಜಲಿ ಪ್ರದರ್ಶನಗೊಂಡು ಭಕ್ತಿರಸದ ವಾತಾವರಣವನ್ನು ಸೃಷ್ಟಿಸಿತು.
ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾದ “ತುಮಕು ಚಲತಾ ರಾಮಚಂದ್ರ” ಕಥಕ್ ರೂಪಕವು ವಿಶೇಷ ಮೆಚ್ಚುಗೆ ಗಳಿಸಿತು. ಶ್ರೀರಾಮನ ಜೀವನದಲ್ಲಿ ತಾಯಿತನದ ಮೂರು ವಿಭಿನ್ನ ಆಯಾಮಗಳನ್ನು ಹಾಗೂ ಭಕ್ತಕವಿ ತುಳಸಿದಾಸರ ಭಾವಲೋಕವನ್ನು ಕಲಾತ್ಮಕವಾಗಿ ಜೋಡಿಸಿ ಪ್ರೇಕ್ಷಕರ ಮನಸ್ಸನ್ನು ಸ್ಪರ್ಶಿಸಿತು.
ಕಾರ್ಯಕ್ರಮದ ಕೇಂದ್ರಬಿಂದುವಾಗಿದ್ದ “ದುರ್ಗಾ ವರ್ಣಂ” ಭರತನಾಟ್ಯ ಪ್ರದರ್ಶನವು ದೇವಿ ದುರ್ಗೆಯ ಶೌರ್ಯ, ಕರುಣೆ, ರಕ್ಷಣಾತ್ಮಕ ಶಕ್ತಿ ಹಾಗೂ ಸ್ತ್ರೀಶಕ್ತಿಯ ವೈಭವವನ್ನು ಅತ್ಯಂತ ಪರಿಣಾಮಕಾರಿಯಾಗಿ ಚಿತ್ರಿಸಿತು. ನೃತ್ಯಗಾರ್ತಿಯರ ಅಭಿವ್ಯಕ್ತಿ, ನೃತ್ಯ ಸಂಯೋಜನೆ ಹಾಗೂ ವೇದಿಕೆ ನಿರ್ವಹಣೆ ಪ್ರೇಕ್ಷಕರನ್ನು ಸಂಪೂರ್ಣವಾಗಿ ತಲ್ಲೀನಗೊಳಿಸಿತು.
ಇದಕ್ಕೆ ಪೂರಕವಾಗಿ ಕಥಕ್ ಶೈಲಿಯಲ್ಲಿ ಪ್ರದರ್ಶಿಸಲಾದ “ದುರ್ಗಾ ಸ್ತುತಿ” ಆದಿಶಕ್ತಿಯ ಅಪಾರ ಮಹಿಮೆಯನ್ನು ಮತ್ತು ಶಕ್ತಿಸ್ವರೂಪಿಣಿಯ ವೈಭವವನ್ನು ಮನೋಜ್ಞವಾಗಿ ಬಿಂಬಿಸಿತು. ನೃತ್ಯದ ಉತ್ಸಾಹಭರಿತ ನಿರೂಪಣೆ ಹಾಗೂ ಲಯ ವೈವಿಧ್ಯತೆ ವಿಶೇಷ ಗಮನ ಸೆಳೆಯಿತು.
ಭರತನಾಟ್ಯ ವಿಭಾಗದಲ್ಲಿ ಜನಪ್ರಿಯ ಕೃಷ್ಣಾಭಿನಯ “ವಿಷಮಕಾರಿ ಕಣ್ಣ” ಪ್ರದರ್ಶನಗೊಂಡು ಬಾಲಕೃಷ್ಣನ , ಲೀಲಾಮಾಧುರ್ಯ ಮತ್ತು ಭಕ್ತಿಭಾವವನ್ನು ಮನಮೋಹಕವಾಗಿ ಅನಾವರಣಗೊಳಿಸಿತು.
ಕಾರ್ಯಕ್ರಮದ ಸಮಾರೋಪವಾಗಿ ಕಥಕ್ ಶೈಲಿಯ ಸುಂದರ “ತರಾನಾ” ಪ್ರದರ್ಶನಗೊಂಡು ತನ್ನ ಚುರುಕು ಲಯ, ಮನೋಹರ ಚಲನಶೈಲಿ ಹಾಗೂ ಸೊಗಸಾದ ನಿರೂಪಣೆಯ ಮೂಲಕ ರಸಿಕರನ್ನು ರಂಜಿಸಿತು.
“ತುಮಕು ಚಲತಾ ರಾಮಚಂದ್ರ”, “ದುರ್ಗಾ ವರ್ಣಂ”, “ದುರ್ಗಾ ಸ್ತುತಿ” ಹಾಗೂ “ತಾರಾನಾ” ಕೃತಿಗಳಿಗೆ ಶರತ್ ಪ್ರಭಾತ್ ಅವರು ಸಂಗೀತ ಸಂಯೋಜನೆ ನೀಡಿದ್ದು ಅಪಾರ ಮೆಚ್ಚುಗೆಗೆ ಪಾತ್ರವಾಯಿತು. “ದುರ್ಗಾ ವರ್ಣಂ” ಸಾಹಿತ್ಯ ರಚನೆ ಹಾಗೂ ಕಾರ್ಯಕ್ರಮದಲ್ಲಿನ ಎಲ್ಲಾ ಕಥಕ್ ನೃತ್ಯ ಸಂಯೋಜನೆಗಳನ್ನೂ ಶರತ್ ಅವರೇ ನಿರ್ವಹಿಸಿದ್ದರು.
ಭರತನಾಟ್ಯ ವಿಭಾಗದ ಎಲ್ಲಾ ನೃತ್ಯ ಸಂಯೋಜನೆಗಳನ್ನು ದಿವ್ಯ ಪ್ರಭಾತ್ ಅವರು ರೂಪಿಸಿದ್ದು, ಅವರ ಕಲಾತ್ಮಕ ದೃಷ್ಟಿಕೋನ, ನೃತ್ಯ ವಿನ್ಯಾಸ ಹಾಗೂ ಅಭಿವ್ಯಕ್ತಿಯ ಆಳವು ವಿಶೇಷವಾಗಿ ಗಮನ ಸೆಳೆಯಿತು.
ಭರತನಾಟ್ಯ ತ್ರಯಿಯ ದೀಕ್ಷಾ ಜೋಶಿ, ಪಾಯಲ್ ಮತ್ತು ತಾನ್ಯಾ ಅವರು ಪ್ರತಿಯೊಂದು ಕೃತಿಯಲ್ಲಿಯೂ ತಮ್ಮ ಪ್ರತಿಭೆಯನ್ನು ಅನಾವರಣಗೊಳಿಸಿದರು. ವಿಶೇಷವಾಗಿ ದುರ್ಗಾ ವರ್ಣಂನಲ್ಲಿ ಅವರ ಸಮರ್ಪಣೆ, ಅಭ್ಯಾಸ ಮತ್ತು ಕಲಾತ್ಮಕ ಪ್ರೌಢಿಮೆ ಸ್ಪಷ್ಟವಾಗಿ ಗೋಚರಿಸಿತು.
ಕಥಕ್ ತ್ರಯಿಯ ಆದ್ಯಾ, ಅನನ್ಯಾ ಮತ್ತು ಸ್ವಪಾಂತಿ ಅವರು ತಮ್ಮ ವೇಗದ ಪದಚಲನಗಳು, ನಿಖರ ಚಕ್ಕರ್ಗಳು ಹಾಗೂ ಉತ್ಸಾಹಭರಿತ ಪ್ರದರ್ಶನದ ಮೂಲಕ ಸಭಾಂಗಣವನ್ನು ರಂಜಿಸಿ ಪ್ರೇಕ್ಷಕರಿಂದ ಭಾರೀ ಮೆಚ್ಚುಗೆ ಪಡೆದರು.
“III” ಕಾರ್ಯಕ್ರಮವು ಭರತನಾಟ್ಯ ಮತ್ತು ಕಥಕ್ ನೃತ್ಯಪ್ರಕಾರಗಳ ಸೌಂದರ್ಯವನ್ನು ಯುವ ಪ್ರತಿಭೆಗಳ ಮೂಲಕ ಅದ್ಭುತವಾಗಿ ಅನಾವರಣಗೊಳಿಸಿದ ಸ್ಮರಣೀಯ ಕಲಾಸಂಜೆಯಾಗಿ ಯಶಸ್ವಿಯಾಯಿತು.
ಮುಖ್ಯ ಅತಿಥಿಯಾಗಿ ಮಹಾತಿ ಕಣ್ಣನ್ ಕಾರ್ಯಕ್ರಮವನ್ನು ಉದ್ಘಾಟಿಸಿದರು. ಈ ಸಂದರ್ಭದಲ್ಲಿ ಶ್ರೀಮತಿ ಶಕುಂತಲಾ ರಾಘವೇಂದ್ರ ಪ್ರಭಾತ್, ಶರತ್ ಪ್ರಭಾತ್, ಶ್ರೀಮತಿ ದಿವ್ಯ ಭರತ್ ಪ್ರಭಾತ್ ಉಪಸ್ಥಿತರಿದ್ದರು
