ಆಯುಧ ಪೂಜೆ ಕಾಯಕದ ಕೈಗಳಿಗೆ ಕಾವ್ಯದ ಕಿರೀಟ

ವಿಜಯ ದರ್ಪಣ ನ್ಯೂಸ್…..

ಆಯುಧ ಪೂಜೆ ಕಾಯಕದ ಕೈಗಳಿಗೆ ಕಾವ್ಯದ ಕಿರೀಟ

ಶರದೃತುವಿನ ಶುಭೋದಯದಿ ಶಾರದೆಯ ನಗೆ ಅರಳಿದೆ
ನವರಾತ್ರಿಯ ನವವೈಭವದಿ ನಾಡಿನ ಮನೆ ಬೆಳಗಿದೆ
ತಳಿರು ತೋರಣ ಹೂವಿನ ಹಾರ ದೀಪದ ದಿವ್ಯ ಜ್ಯೋತಿ
ಆಯುಧ ಪೂಜೆಯ ಪಾವನ ಹೊತ್ತಲಿ ಮಿಂದೆದ್ದಿದೆ ಭಕ್ತಿಪ್ರೀತಿ

ದುರ್ಗೆಯ ದಿವ್ಯಶಕ್ತಿಯ ಮಹಿಮೆಯಲಿ ದುಷ್ಟತನಕೆ ಸೋಲು
ಧರ್ಮದ ದಾರಿಯಲಿ ನಡೆದವರಿಗೆ ವಿಜಯದ ಹೂವಿನ ಮಾಲೆ
ಮಹಿಷಾಸುರ ಮರ್ದಿನಿಯ ಶೌರ್ಯವು ಸಾರುವುದು ಸತ್ಯದ ಸಾರ
ಅಧರ್ಮವನು ಅಳಿಸಿ ಧರ್ಮವನು ಎತ್ತಿಹಿಡಿಯುವುದೇ ಹಬ್ಬದ ಹಾರ

ಬದುಕಿನ ಬಂಡಿ ಸಾಗಿಸುವ ಸಾಧನಗಳೆಲ್ಲ ಕತ್ತಿ ಖಡ್ಗಗಳಷ್ಟೇ ಅಲ್ಲವಯ್ಯ
ಕಾಯಕದ ಕೈಯಲಿ ಮಿನುಗುವ ಸಾಧನಗಳೆಲ್ಲವೂ* ಪೂಜನೀಯವಯ್ಯ
ನೇಗಿಲು ಕುಡುಗೋಲು ಗುದ್ದಲಿ ಸುತ್ತಿಗೆ ಉಳಿಯ ನಾದ
ಇವುಗಳ ಬೆನ್ನಲಿ ನಿಂತಿದೆ ಮನುಜನ ಬದುಕಿನ ವೇದ

ರೈತನ ನೇಗಿಲು ಭೂತಾಯಿಯ ಎದೆಯಲಿ ಬರೆದ ಕವಿತೆ
ಬೆವರ ಹನಿಯಲಿ ಮೊಳೆಯುವುದು ಅನ್ನದಾತನ ಅಮೃತಗೀತೆ
ಮಣ್ಣಿನ ಮಡಿಲಲಿ ಬಿತ್ತಿದ ಬೀಜವು ಹಸಿರಾಗಿ ನಲಿಯುವುದು
ರೈತನ ಶ್ರಮದ ಫಲದಿಂದಲೇ ಜಗದ ಹೊಟ್ಟೆ ತುಂಬುವುದು

ಕಮ್ಮಾರನ ಕುಲುಮೆಯ ಕಾವಲಿ ಕಬ್ಬಿಣಕೆ ಹೊಸ ರೂಪ
ಬಡಗಿಯ ಉಳಿಯ ಏಟಿನಲಿ ಅರಳುವುದು ಕಲೆಯ ಸ್ವರೂಪ
ನೇಕಾರನ ಮಗ್ಗದ ನಾದದಲಿ ನೂಲಿನ ಕನಸು ಹೆಣೆಯುತ್ತದೆ
ಕುಂಬಾರನ ಕರದ ಸ್ಪರ್ಶದಲಿ ಮಣ್ಣಿಗೂ ಜೀವ ದೊರೆಯುತ್ತದೆ

ಕಾರ್ಮಿಕನ ಬೆವರ ಹನಿಯಲಿ ಕಟ್ಟಡಗಳೆದ್ದು ನಿಲ್ಲುವವು
ಶ್ರಮಿಕನ ಶ್ರಮದ ಫಲದಿಂದ ನಾಡಿನ ಚಕ್ರಗಳು ತಿರುಗುವವು
ಚಾಲಕನ ಕೈಯಲಿ ವಾಹನ ವೈದ್ಯನ ಕೈಯಲಿ ಜೀವದಾನ
ಸೈನಿಕನ ಎದೆಯಲಿ ದೇಶದ ರಕ್ಷಣೆಯ ಅಭಿಮಾನ

ವಿದ್ಯಾರ್ಥಿಯ ಲೇಖನಿಯಲಿ ವಿದ್ಯೆಯ ಬೆಳಕು ಮೂಡಲಿ
ಗುರುವಿನ ಜ್ಞಾನದೀಪದಿ ಅಜ್ಞಾನದ ಕತ್ತಲು ಕಳೆಯಲಿ
ವ್ಯಾಪಾರಿಯ ತಕ್ಕಡಿಯಲಿ ನ್ಯಾಯದ ತೂಕವೇ ನೆಲೆಸಲಿ
ಪ್ರತಿಯೊಂದು ಕಾಯಕದ ಕೈಯಲಿ ಪ್ರಾಮಾಣಿಕತೆಯ ಹೂ ಅರಳಲಿ

ಹೂವಿನ ಪರಿಮಳ ಸಾಧನಕೆ ಅರಿಶಿನ ಕುಂಕುಮದ ಅಲಂಕಾರ
ದೀಪದ ಬೆಳಕು ಮನೆಮನಕೆ ಭಕ್ತಿಯ ಭಾವದ ಸಂಸ್ಕಾರ
ಹಣ್ಣಿನ ಸಿಹಿಯಲಿ ಹಂಚೋಣ ಪ್ರೀತಿ ನೈವೇದ್ಯದಲಿ ಕೃತಜ್ಞತೆ
ಆಯುಧ ಪೂಜೆಯ ಅಂತರಾಳದಿ ಬೆಳಗಲಿ ಮಾನವೀಯತೆ

ಶ್ರದ್ಧೆಯೆಂದರೆ ಹೂವಿಡುವುದಷ್ಟೇ ಅಲ್ಲವಯ್ಯ
ಪೂಜೆಯೆಂದರೆ ಸಾಧನದ ಮೌಲ್ಯ ಅರಿಯುವುದೂ ಹೌದಯ್ಯ
ಸ್ವಚ್ಛತೆ ಶಿಸ್ತು ಸುರಕ್ಷತೆಯೇ ನಿತ್ಯದ ಪೂಜೆಯಾಗಲಿ
ಪ್ರಾಮಾಣಿಕ ದುಡಿಮೆಯೇ ಬದುಕಿನ ನಿಜದೇವತೆಯಾಗಲಿ

ಸಾಧನ ಪೂಜಿಸುವ ಕೈಗಳಿಗೆ ನ್ಯಾಯದ ಕೂಲಿ ದೊರಕಲಿ*ಯ
ಬೆವರು ಸುರಿಸುವ ಬಡವರ ಬಾಳಲಿ ನೆಮ್ಮದಿಯ ಹೂ ಅರಳಲಿ
ಶ್ರಮಿಕನ ಬೆವರ ಹನಿಗೆ ಸಮಾಜದ ಗೌರವ ಸಲ್ಲಲಿ
ದುಡಿವವನ ಮನೆಯಂಗಳದಿ ಸಂತಸದ ದೀಪ ಬೆಳಗಲಿ

ಕತ್ತಿಯ ಮೊನೆಯಲ್ಲಿ ಕ್ರೌರ್ಯವಲ್ಲ ನ್ಯಾಯದ ಸಂಕಲ್ಪವಿರಲಿ
ಶಕ್ತಿಯ ಹೆಸರಿನಲ್ಲಿ ದ್ವೇಷವಲ್ಲ ಪ್ರೀತಿಯ ಪರಿಮಳವಿರಲಿ
ಕೋಪವೆಂಬ ಆಯುಧವನು ಕೆಳಗಿಟ್ಟು ಕರುಣೆಯ ಕವಚ ತೊಡೋಣ
ಸತ್ಯ-ಶಾಂತಿ-ಸೌಹಾರ್ದದ ವಿಜಯಧ್ವಜವನು ಎತ್ತಿಹಿಡಿಯೋಣ

ಕಾಯಕವೇ ಕೈಲಾಸವೆಂಬ ಕನ್ನಡದ ಹಿರಿಯರ ನುಡಿ
ದುಡಿಮೆಯೇ ದೈವವೆಂಬ ಬದುಕಿನ ಅಮೃತದ ಗುಡಿ
ಶ್ರಮವೇ ಶಕ್ತಿ ನಿಷ್ಠೆಯೇ ಭಕ್ತಿ, ಮಾನವೀಯತೆಯೇ ಧರ್ಮ
ಪರಿಶ್ರಮದ ಹಾದಿಯಲಿ ಅರಳಲಿ ಸಮೃದ್ಧಿಯ ಕರ್ಮ

ವಿಜಯದಶಮಿಯ ವಿಜಯತಿಲಕವು ಪ್ರತಿಯೊಂದು ಹಣೆಗೂ ಶೋಭಿಸಲಿ
ಒಳ್ಳೆಯ ಚಿಂತನೆಯ ಸುವರ್ಣಕಿರಣ ಪ್ರತಿ ಹೃದಯದಲಿ ಬೆಳಗಲಿ
ದುಷ್ಟತನದ ಕತ್ತಲು ಕಳೆದು ಸತ್ಯದ ಸೂರ್ಯ ಉದಯಿಸಲಿ
ನಾಡಿನ ಜನರ ಬದುಕಿನಲಿ ಸುಖಸಮೃದ್ಧಿ ನೆಲೆಸಲಿ

ಹೂವಿನ ಪೂಜೆಯಲಿ ಭಕ್ತಿಯಿರಲಿ
ಕಾಯಕದ ಹಾದಿಯಲಿ ನಿಷ್ಠೆಯಿರಲಿ
ಸಾಧನದ ಸನ್ನಿಧಿಯಲಿ ಕೃತಜ್ಞತೆಯಿರಲಿ
ಮನುಜ ಹೃದಯದಲಿ ಮಾನವೀಯತೆಯಿರಲಿ

ಸರ್ವರಿಗೂ ಆಯುಧ ಪೂಜೆ ಹಾಗೂ ವಿಜಯದಶಮಿ ಹಬ್ಬದ ಹಾರ್ದಿಕ ಶುಭಾಶಯಗಳು!

ನಾಡಿನ ಸಮಸ್ತ ಜನರ ಬಾಳಲ್ಲಿ ಆರೋಗ್ಯ ಐಶ್ವರ್ಯ ಶಾಂತಿ ನೆಮ್ಮದಿ ಹಾಗೂ ಯಶಸ್ಸು ಸದಾ ನೆಲೆಸಲಿ ಧರ್ಮದ ವಿಜಯವಾಗಲಿ ಕಾಯಕಕ್ಕೆ ಗೌರವ ಸಿಗಲಿ ಮಾನವೀಯತೆಗೆ ಜಯವಾಗಲಿ

ಶುಭವಾಗಲಿ ಸರ್ವರಿಗೂ… ವಿಜಯವಾಗಲಿ ಸತ್ಯಕ್ಕೆ… ಜಯವಾಗಲಿ ಕಾಯಕಕ್ಕೆ

✍🏽 ಎಂಎಂ ದಾವೂದ್
9945375180