ದಸರಾ ಬಂತು ಪ್ರವಾಸಿಗರು ಬರಲಿಲ್ಲ ಕೊಡಗಿನ ವ್ಯಾಪಾರಸ್ಥರ ಬದುಕಿಗೆ ಬಿದ್ದ ಹೊಡೆತಕ್ಕೆ ಹೊಣೆಗಾರರು ಯಾರು !

ವಿಜಯ ದರ್ಪಣ ನ್ಯೂಸ್….

ದಸರಾ ಬಂತು ಪ್ರವಾಸಿಗರು ಬರಲಿಲ್ಲ ಕೊಡಗಿನ ವ್ಯಾಪಾರಸ್ಥರ ಬದುಕಿಗೆ ಬಿದ್ದ ಹೊಡೆತಕ್ಕೆ ಹೊಣೆಗಾರರು ಯಾರು !

ಮಡಿಕೇರಿ–ಕುಶಾಲನಗರದ ವ್ಯಾಪಾರ ವಲಯದಲ್ಲಿ ಆತಂಕ ಪ್ರವಾಸೋದ್ಯಮದ ವೈಫಲ್ಯವೇ ಆಡಳಿತಾತ್ಮಕ ಲೋಪವೇ ರಾಜಕೀಯ ವೈಷಮ್ಯವೇ? ಸರ್ಕಾರ ಉತ್ತರಿಸಲಿ: ಕೊಡಗು ಜನ ಅಭಿವೃದ್ಧಿ ಸಮಿತಿ ಆಗ್ರಹ

ಮಡಿಕೇರಿ: 21 ಅಕ್ಟೋಬರ್: ಕೊಡಗು ಜಿಲ್ಲೆ ಪ್ರವಾಸೋದ್ಯಮ ಪ್ರಕೃತಿ ಸೌಂದರ್ಯ ಆತಿಥ್ಯ ಮತ್ತು ಆರ್ಥಿಕ ಚಟುವಟಿಕೆಗಳ ಸಂಗಮ. ಇಲ್ಲಿ ಪ್ರವಾಸೋದ್ಯಮ ಕೇವಲ ಮನರಂಜನೆಯ ಕ್ಷೇತ್ರವಲ್ಲ; ಸಾವಿರಾರು ಕುಟುಂಬಗಳ ಅನ್ನದ ಮೂಲ ನೂರಾರು ಉದ್ಯಮಿಗಳ ಹೂಡಿಕೆಯ ಆಧಾರ ಹಾಗೂ ಅಸಂಖ್ಯಾತ ಕಾರ್ಮಿಕರ ಬದುಕಿನ ಆಸರೆಯಾಗಿದೆ. 2026ರ ದಸರಾ ಸಂದರ್ಭದಲ್ಲಿ ಮಡಿಕೇರಿ ಮತ್ತು ಕುಶಾಲನಗರ ಸೇರಿದಂತೆ ಕೊಡಗಿನ ಪ್ರಮುಖ ವ್ಯಾಪಾರ ಕೇಂದ್ರಗಳಲ್ಲಿ ನಿರೀಕ್ಷಿತ ಜನಸಂದಣಿ ಮತ್ತು ವ್ಯಾಪಾರ ಚಟುವಟಿಕೆ ಕಾಣದಿರುವ ಬಗ್ಗೆ ವ್ಯಾಪಾರಸ್ಥರು ವ್ಯಕ್ತಪಡಿಸುತ್ತಿರುವ ಆತಂಕ ಈಗ ಗಂಭೀರ ಚರ್ಚೆಗೆ ಕಾರಣವಾಗಿದೆ.

ಪ್ರತಿವರ್ಷ ದಸರಾ ಸಂದರ್ಭದಲ್ಲಿ ಪ್ರವಾಸಿಗರಿಂದ ತುಂಬಿ ತುಳುಕುತ್ತಿದ್ದ ವಸತಿ ಘಟಕಗಳು ಈ ಬಾರಿ ಖಾಲಿ ಉಳಿದಿವೆ ಎಂಬ ಉದ್ಯಮಿಗಳ ಅಳಲು ಜಿಲ್ಲೆಯ ಪ್ರವಾಸೋದ್ಯಮದ ಸ್ಥಿತಿಗತಿ ಕುರಿತು ಅನೇಕ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ

ದಸರಾ ಹಬ್ಬವೆಂದರೆ ಕೊಡಗಿನ ವ್ಯಾಪಾರಸ್ಥರಿಗೆ ಹೊಸ ನಿರೀಕ್ಷೆ, ಹೊಸ ಆದಾಯ ಮತ್ತು ಆರ್ಥಿಕ ಚೇತರಿಕೆಯ ಭರವಸೆ. ಪ್ರವಾಸಿಗರ ಆಗಮನ ಹೆಚ್ಚಾಗುತ್ತದೆ ಎಂಬ ನಿರೀಕ್ಷೆಯಲ್ಲಿ ಹೋಟೆಲ್‌ ಮಾಲೀಕರು ಲಾಡ್ಜ್‌ ಮಾಲೀಕರು, ಹೋಂಸ್ಟೇ ಮತ್ತು ರೆಸಾರ್ಟ್‌ ಉದ್ಯಮಿಗಳು ಮುಂಚಿತವಾಗಿ ಸಿದ್ಧತೆ ಮಾಡಿಕೊಳ್ಳುತ್ತಾರೆ. ಸಿಬ್ಬಂದಿಯನ್ನು ನೇಮಿಸಿಕೊಳ್ಳುತ್ತಾರೆ ಅಗತ್ಯ ವಸ್ತುಗಳನ್ನು ಖರೀದಿಸುತ್ತಾರೆ ಕಟ್ಟಡಗಳ ನಿರ್ವಹಣೆಗೆ ಹಣ ವ್ಯಯಿಸುತ್ತಾರೆ. ಪ್ರವಾಸಿ ವಾಹನ ಚಾಲಕರು ಸಣ್ಣ ಅಂಗಡಿ ವ್ಯಾಪಾರಿಗಳು ಹೋಟೆಲ್‌ ಕಾರ್ಮಿಕರು ಹಾಗೂ ಸ್ಥಳೀಯ ಉತ್ಪನ್ನಗಳ ಮಾರಾಟಗಾರರೂ ಈ ದಿನಗಳಲ್ಲಿ ಉತ್ತಮ ವ್ಯಾಪಾರವಾಗಬಹುದೆಂಬ ಆಶಯ ಹೊಂದಿರುತ್ತಾರೆ ಆದರೆ ನಿರೀಕ್ಷಿತ ಪ್ರಮಾಣದಲ್ಲಿ ಪ್ರವಾಸಿಗರು ಆಗಮಿಸದಿದ್ದರೆ ಈ ಎಲ್ಲರ ಲೆಕ್ಕಾಚಾರವೂ ತಲೆಕೆಳಗಾಗುತ್ತದೆ ಈ ವರ್ಷದ ದಸರಾ ಸಂದರ್ಭದಲ್ಲಿ ವ್ಯಾಪಾರದಲ್ಲಿ ಗಣನೀಯ ಕುಸಿತವಾಗಿದೆ ಎಂದು ಕೆಲವು ಉದ್ಯಮಿಗಳು ಹೇಳುತ್ತಿದ್ದು ಅವರ ಅಂದಾಜಿನ ಪ್ರಕಾರ ಸುಮಾರು ಶೇ. 60ರಷ್ಟು ವಹಿವಾಟು ಕಡಿಮೆಯಾಗಿದೆ ಎಂಬ ಆತಂಕವೂ ವ್ಯಕ್ತವಾಗಿದೆ ಈ ಅಂಕಿಅಂಶಗಳನ್ನು ಅಧಿಕೃತವಾಗಿ ಪರಿಶೀಲಿಸಬೇಕಾದ ಅಗತ್ಯವಿದ್ದರೂ ವ್ಯಾಪಾರಸ್ಥರ ಸಂಕಷ್ಟವನ್ನು ಕಡೆಗಣಿಸಲು ಸಾಧ್ಯವಿಲ್ಲ.

ಹಾಗಾದರೆ ಈ ಬಾರಿ ಕೊಡಗಿನ ದಸರಾ ಸಂದರ್ಭದಲ್ಲಿ ಜನಸಂದಣಿ ನಿರೀಕ್ಷಿತ ಮಟ್ಟದಲ್ಲಿ ಕಾಣದಿರಲು ಕಾರಣವೇನು? ಪ್ರವಾಸಿಗರು ಕೊಡಗಿನಿಂದ ದೂರ ಉಳಿಯಲು ಕಾರಣಗಳೇನು? ಪ್ರವಾಸೋದ್ಯಮ ಇಲಾಖೆಯ ಪ್ರಚಾರದಲ್ಲಿ ಕೊರತೆಯಿದೆಯೇ? ದಸರಾ ಕಾರ್ಯಕ್ರಮಗಳ ಯೋಜನೆ ಮತ್ತು ನಿರ್ವಹಣೆಯಲ್ಲಿ ಲೋಪವಾಗಿದೆಯೇ? ಪ್ರವಾಸಿಗರಿಗೆ ಅಗತ್ಯವಾದ ಸೌಲಭ್ಯಗಳ ಕೊರತೆಯಿದೆಯೇ? ಅಥವಾ ರಾಜಕೀಯ ವೈಷಮ್ಯ, ಪರಸ್ಪರ ಪ್ರತಿಷ್ಠೆಯ ಪೈಪೋಟಿ ಮತ್ತು ಸಮನ್ವಯದ ಕೊರತೆಗಳು ಹಬ್ಬದ ವಾತಾವರಣದ ಮೇಲೆ ಪರಿಣಾಮ ಬೀರಿವೆಯೇ?ಈ ಪ್ರಶ್ನೆಗಳಿಗೆ ಸಂಬಂಧಪಟ್ಟವರು ವಾಸ್ತವಾಂಶಗಳ ಆಧಾರದ ಮೇಲೆ ಉತ್ತರಿಸಬೇಕಾಗಿದೆ.

ದಸರಾ ಕಾರ್ಯಕ್ರಮಗಳ ಆಯೋಜನೆ ಮನರಂಜನಾ ಕಾರ್ಯಕ್ರಮಗಳ ಸಮಯ ಡಿಜೆ ಬಳಕೆ ಧ್ವನಿವರ್ಧಕಗಳ ನಿಯಮಗಳು ಮತ್ತು ಕಾನೂನು ಸುವ್ಯವಸ್ಥೆಗೆ ಸಂಬಂಧಿಸಿದ ವಿಚಾರಗಳು ಸಾರ್ವಜನಿಕ ಚರ್ಚೆಗೆ ಬಂದಿರುವುದು ಎಲ್ಲರ ಗಮನದಲ್ಲಿದೆ. ಕಾನೂನು ಪಾಲನೆ ಮತ್ತು ಸಾರ್ವಜನಿಕರ ನೆಮ್ಮದಿಯನ್ನು ಕಾಪಾಡುವುದು ಆಡಳಿತದ ಕರ್ತವ್ಯವೇ ಸರಿ. ಆದರೆ ಹಬ್ಬದ ಕಾರ್ಯಕ್ರಮಗಳನ್ನು ರೂಪಿಸುವಾಗಲೇ ಸ್ಪಷ್ಟ ನಿಯಮಗಳು ಸೂಕ್ತ ಪ್ರಚಾರ ಮತ್ತು ಎಲ್ಲರ ಸಹಕಾರವನ್ನು ಖಚಿತಪಡಿಸಿಕೊಳ್ಳಬೇಕಾಗುತ್ತದೆ. ಕೊನೆಯ ಕ್ಷಣದ ಗೊಂದಲಗಳು ಪರಸ್ಪರ ಆರೋಪಗಳು ಅಥವಾ ನಿರ್ಧಾರಗಳ ಬಗ್ಗೆ ಸ್ಪಷ್ಟತೆಯ ಕೊರತೆ ಉಂಟಾದರೆ ಅದರ ಪರಿಣಾಮ ಏನಾಗುತ್ತದೆ ಎಂಬುದನ್ನೂ ಪರಿಶೀಲಿಸಬೇಕು

ಇಲ್ಲಿ ಅತ್ಯಂತ ಮುಖ್ಯವಾದ ಪ್ರಶ್ನೆ ಎಂದರೆ, ದಸರಾ ಆಯೋಜನೆ ಮತ್ತು ಪ್ರವಾಸೋದ್ಯಮದ ಅಭಿವೃದ್ಧಿಗೆ ಹೊಣೆಗಾರರಾಗಿರುವವರು ತಮ್ಮ ಜವಾಬ್ದಾರಿಯನ್ನು ಎಷ್ಟರ ಮಟ್ಟಿಗೆ ನಿರ್ವಹಿಸಿದ್ದಾರೆ ಎಂಬುದು. ಪ್ರವಾಸಿಗರನ್ನು ಆಕರ್ಷಿಸುವುದು ಕೇವಲ ದಸರಾ ಸಮಿತಿಯ ಕೆಲಸವಲ್ಲ* *ಪ್ರವಾಸೋದ್ಯಮ ಇಲಾಖೆ ಜಿಲ್ಲಾಡಳಿತ ಸ್ಥಳೀಯ ಸಂಸ್ಥೆಗಳು ಪೊಲೀಸ್ ಇಲಾಖೆ ಜನಪ್ರತಿನಿಧಿಗಳು ಮತ್ತು ಸಂಬಂಧಪಟ್ಟ ಸಂಘಟನೆಗಳೂ ಸಮನ್ವಯದಿಂದ ಕಾರ್ಯನಿರ್ವಹಿಸಬೇಕಾಗಿದೆ ಕೊಡಗಿನ ಪ್ರವಾಸಿ ತಾಣಗಳ ವೈಶಿಷ್ಟ್ಯವನ್ನು ವ್ಯಾಪಕವಾಗಿ ಪ್ರಚಾರ ಮಾಡುವುದು ಪ್ರವಾಸಿಗರಿಗೆ ಅಗತ್ಯ ಮಾಹಿತಿ ಒದಗಿಸುವುದು ಸುಗಮ ಸಂಚಾರ ವ್ಯವಸ್ಥೆ ಕಲ್ಪಿಸುವುದು ಹಾಗೂ ಹಬ್ಬದ ಕಾರ್ಯಕ್ರಮಗಳ ಬಗ್ಗೆ ಮುಂಚಿತ ಸ್ಪಷ್ಟತೆ ನೀಡುವುದು ಆಡಳಿತಾತ್ಮಕ ಯೋಜನೆಯ ಭಾಗವಾಗಿರಬೇಕು. ಇವೆಲ್ಲದರ ಪರಿಣಾಮಕಾರಿತ್ವವನ್ನು ಪರಿಶೀಲಿಸುವ ಸಮಯ ಈಗ ಬಂದಿದೆ.

*ಯರಾಜಕೀಯ ಭಿನ್ನಾಭಿಪ್ರಾಯಗಳು ಪ್ರಜಾಪ್ರಭುತ್ವದ ಸಹಜ ಭಾಗ ರಾಜಕೀಯ ವೈಷಮ್ಯ ಅಥವಾ ವೈಯಕ್ತಿಕ ಪ್ರತಿಷ್ಠೆಯ ಪೈಪೋಟಿ ಸಾರ್ವಜನಿಕ ಹಿತಾಸಕ್ತಿಗಿಂತ ದೊಡ್ಡದಾಗಬಾರದು ಜನಪ್ರತಿನಿಧಿಗಳು ಮತ್ತು ವಿವಿಧ ಸಂಘಟನೆಗಳ ನಡುವೆ ಅಭಿಪ್ರಾಯ ಭೇದಗಳಿದ್ದರೆ ಅವುಗಳನ್ನು ಚರ್ಚೆಯ ಮೂಲಕ ಬಗೆಹರಿಸಿಕೊಳ್ಳಬೇಕು ಕೊಡಗಿನ ಸಾಂಸ್ಕೃತಿಕ ಪರಂಪರೆ ಮತ್ತು ಪ್ರವಾಸೋದ್ಯಮದ ಭವಿಷ್ಯವನ್ನು ವೈಯಕ್ತಿಕ ಪ್ರತಿಷ್ಠೆಯ ಪ್ರಶ್ನೆಯನ್ನಾಗಿ ಮಾಡಬಾರದು ಯಾರ ಕಾರ್ಯಕ್ರಮ ದೊಡ್ಡದು ಯಾರ ಪ್ರಭಾವ ಹೆಚ್ಚು ಎಂಬುದಕ್ಕಿಂತ ಕೊಡಗಿಗೆ ಎಷ್ಟು ಪ್ರವಾಸಿಗರು ಬಂದರು ಸ್ಥಳೀಯ ವ್ಯಾಪಾರಸ್ಥರಿಗೆ ಎಷ್ಟು ಆದಾಯ ದೊರೆಯಿತು ಎಷ್ಟು ಜನರಿಗೆ ಉದ್ಯೋಗ ಸಿಕ್ಕಿತು ಎಂಬುದೇ ಮುಖ್ಯವಾಗಬೇಕು.

ರಾಜಕೀಯ ನಾಯಕರು ಪ್ರತಿಷ್ಠೆಯ ಲೆಕ್ಕಾಚಾರದಲ್ಲಿ ತೊಡಗಿದ್ದರೆ ಅದರ ಆರ್ಥಿಕ ಪರಿಣಾಮವನ್ನು ಎದುರಿಸುವವರು ಸಾಮಾನ್ಯ ವ್ಯಾಪಾರಸ್ಥರು ನಿರ್ಧಾರ ಕೈಗೊಳ್ಳುವವರು ಬೇರೆ ನಷ್ಟ ಅನುಭವಿಸುವವರು ಬೇರೆ ಎಂಬ ಪರಿಸ್ಥಿತಿ ಮುಂದುವರಿಯಬಾರದು.

*ಯವ್ಯಾಪಾರಸ್ಥರು ಯಾವುದೇ ರಾಜಕೀಯ ಸಂಘರ್ಷದ ಭಾಗವಾಗದೆ ತಮ್ಮ ಉದ್ಯಮದ ಮೂಲಕ ಜಿಲ್ಲೆಯ ಆರ್ಥಿಕ ಬೆಳವಣಿಗೆಗೆ ಕೊಡುಗೆ ನೀಡುತ್ತಿದ್ದಾರೆ ಅವರ ಪರಿಶ್ರಮಕ್ಕೆ ತಕ್ಕ ವಾತಾವರಣ ಕಲ್ಪಿಸುವುದು ಆಡಳಿತ ಮತ್ತು ಜನಪ್ರತಿನಿಧಿಗಳ ಜವಾಬ್ದಾರಿಯಾಗಿದೆ.

ಒಂದು ಹೋಟೆಲ್‌ನಲ್ಲಿ ವ್ಯಾಪಾರ ಕಡಿಮೆಯಾದರೆ ಅದರ ಪರಿಣಾಮ ಅಡುಗೆ ಸಿಬ್ಬಂದಿ, ಸರ್ವರ್‌ಗಳು, ಸ್ವಚ್ಛತಾ ಕಾರ್ಮಿಕರು ಮತ್ತು ಸರಕು ಪೂರೈಕೆದಾರರ ಮೇಲೂ ಬೀಳುತ್ತದೆ. ಹೋಂಸ್ಟೇ ಅಥವಾ ರೆಸಾರ್ಟ್‌ ಖಾಲಿ ಉಳಿದರೆ ಅದರ ನಿರ್ವಹಣಾ ವೆಚ್ಚ, ಸಿಬ್ಬಂದಿಯ ಸಂಬಳ ಮತ್ತು ಸಾಲದ ಕಂತುಗಳನ್ನು ಭರಿಸುವುದು ಕಷ್ಟವಾಗುತ್ತದೆ. ಪ್ರವಾಸಿ ವಾಹನಗಳಿಗೆ ಬೇಡಿಕೆ ಕಡಿಮೆಯಾದರೆ ಚಾಲಕರ ಕುಟುಂಬಗಳ ಆದಾಯಕ್ಕೂ ಹೊಡೆತ ಬೀಳುತ್ತದೆ. ಸಣ್ಣ ಅಂಗಡಿಗಳ ವ್ಯಾಪಾರ ಕುಸಿದರೆ ದಿನದ ದುಡಿಮೆಯನ್ನು ನಂಬಿರುವ ಕುಟುಂಬಗಳು ಸಂಕಷ್ಟಕ್ಕೆ ಸಿಲುಕುತ್ತವೆ. ಹೀಗಾಗಿ ದಸರಾ ಸಂದರ್ಭದಲ್ಲಿ ಪ್ರವಾಸಿಗರ ಆಗಮನ ಕಡಿಮೆಯಾಗಿರುವ ವಿಚಾರವನ್ನು ಕೇವಲ ಹಬ್ಬದ ಆಯೋಜನೆಯ ಸಮಸ್ಯೆಯೆಂದು ಪರಿಗಣಿಸುವುದು ಸರಿಯಲ್ಲ. ಇದು ಕೊಡಗಿನ ಉದ್ಯೋಗ ವ್ಯಾಪಾರ ಮತ್ತು ಆರ್ಥಿಕ ಭದ್ರತೆಗೆ ಸಂಬಂಧಿಸಿದ ವಿಚಾರವಾಗಿದೆ.

ಕೊಡಗು ಜನ ಅಭಿವೃದ್ಧಿ ಸಮಿತಿಯು ಈ ಸಂದರ್ಭದಲ್ಲಿ ಸರ್ಕಾರ ಮತ್ತು ಜಿಲ್ಲಾಡಳಿತಕ್ಕೆ ಸ್ಪಷ್ಟವಾಗಿ ಹೇಳಬಯಸುವುದೇನೆಂದರೆ ವ್ಯಾಪಾರಸ್ಥರ ಸಮಸ್ಯೆಗಳನ್ನು ಕೇವಲ ಭರವಸೆಗಳಿಂದ ಬಗೆಹರಿಸಲು ಸಾಧ್ಯವಿಲ್ಲ ಮಡಿಕೇರಿ ಕುಶಾಲನಗರ ಮತ್ತು ಜಿಲ್ಲೆಯ ಇತರ ಪ್ರಮುಖ ಪ್ರವಾಸಿ ಕೇಂದ್ರಗಳಲ್ಲಿ ಈ ವರ್ಷದ ದಸರಾ ಅವಧಿಯ ಪ್ರವಾಸಿಗರ ಆಗಮನ ಹೋಟೆಲ್‌ ಮತ್ತು ಲಾಡ್ಜ್‌ಗಳ ಕೊಠಡಿ ಕಾಯ್ದಿರಿಸುವಿಕೆ ಹೋಂಸ್ಟೇ ಮತ್ತು ರೆಸಾರ್ಟ್‌ಗಳ ವಸತಿ ಸ್ಥಿತಿ ಹಾಗೂ ವ್ಯಾಪಾರ ವಹಿವಾಟಿನ ಕುರಿತು ವಾಸ್ತವಾಂಶಗಳನ್ನು ಸಂಗ್ರಹಿಸಿ ಪರಿಶೀಲಿಸಬೇಕು ಪ್ರವಾಸೋದ್ಯಮ ಇಲಾಖೆ ದಸರಾ ಆಯೋಜಕರು ವ್ಯಾಪಾರ ಸಂಘಟನೆಗಳು ಮತ್ತು ಉದ್ಯಮಿಗಳೊಂದಿಗೆ ಸಮನ್ವಯ ಸಭೆ ನಡೆಸಿ ಸಮಸ್ಯೆಗಳ ಮೂಲ ಕಾರಣಗಳನ್ನು ಗುರುತಿಸಬೇಕು. ಮುಂದಿನ ದಸರಾ ಮತ್ತು ಪ್ರವಾಸಿ ಋತುಗಳಲ್ಲಿ ಪ್ರವಾಸಿಗರನ್ನು ಆಕರ್ಷಿಸಲು ಪರಿಣಾಮಕಾರಿ ಪ್ರಚಾರ ಉತ್ತಮ ಸೌಲಭ್ಯಗಳು ಸ್ಪಷ್ಟ ಕಾರ್ಯಕ್ರಮಗಳ ವೇಳಾಪಟ್ಟಿ ಮತ್ತು ಸಮಗ್ರ ಕಾರ್ಯಯೋಜನೆಯನ್ನು ರೂಪಿಸಬೇಕು.

ಕೊಡಗು ಜಿಲ್ಲೆ ಪ್ರವಾಸೋದ್ಯಮದ ಮೂಲಕ ರಾಜ್ಯಕ್ಕೆ ತನ್ನದೇ ಆದ ಗುರುತನ್ನು ನೀಡಿದೆ ಇಲ್ಲಿನ ಉದ್ಯಮಿಗಳು ಹೂಡಿಕೆ ಮಾಡಿ ಉದ್ಯೋಗ ಸೃಷ್ಟಿಸಿದ್ದಾರೆ ಸ್ಥಳೀಯ ಕಾರ್ಮಿಕರು ತಮ್ಮ ದುಡಿಮೆಯಿಂದ ಪ್ರವಾಸಿಗರಿಗೆ ಸೇವೆ ಒದಗಿಸಿದ್ದಾರೆ ಇಂತಹ ವಲಯದಲ್ಲಿ ನಿರೀಕ್ಷಿತ ವ್ಯಾಪಾರ ನಡೆಯದಿದ್ದರೆ ಅದರ ಕಾರಣಗಳನ್ನು ಪತ್ತೆಹಚ್ಚಿ ಪರಿಹಾರ ಕಲ್ಪಿಸುವುದು ಸರ್ಕಾರದ ಆದ್ಯತೆಯಾಗಬೇಕು ಪ್ರವಾಸೋದ್ಯಮವನ್ನು ಅಭಿವೃದ್ಧಿಪಡಿಸುವುದಾಗಿ ಹೇಳುವಾಗ ಅದನ್ನು ನಂಬಿ ಬದುಕುತ್ತಿರುವ ಜನರ ಸಮಸ್ಯೆಗಳಿಗೆ ಸ್ಪಂದಿಸುವುದೂ ಅಷ್ಟೇ ಮುಖ್ಯ.

ಕೊಡಗು ಜನ ಅಭಿವೃದ್ಧಿ ಸಮಿತಿಯು ಯಾರ ಮೇಲೂ ಆಧಾರರಹಿತ ಆರೋಪ ಮಾಡುವ ಉದ್ದೇಶ ಹೊಂದಿಲ್ಲ ಆದರೆ ಸಾರ್ವಜನಿಕ ಹಿತಾಸಕ್ತಿಗೆ ಸಂಬಂಧಿಸಿದ ಪ್ರಶ್ನೆಗಳನ್ನು ಕೇಳುವುದು ಮತ್ತು ವ್ಯಾಪಾರಸ್ಥರ ಧ್ವನಿಯನ್ನು ಸರ್ಕಾರದ ಗಮನಕ್ಕೆ ತರುವುದು ನಮ್ಮ ಜವಾಬ್ದಾರಿಯಾಗಿದೆ.* *ದಸರಾ ಸಂದರ್ಭದಲ್ಲಿ ಜನಸಂದಣಿ ನಿರೀಕ್ಷಿತ ಮಟ್ಟದಲ್ಲಿ ಏಕೆ ಇರಲಿಲ್ಲ ಎಂಬುದಕ್ಕೆ ವಾಸ್ತವಾಂಶಗಳ ಆಧಾರದ ಮೇಲೆ ಉತ್ತರ ದೊರೆಯಬೇಕು. ಪ್ರವಾಸೋದ್ಯಮ ಇಲಾಖೆಯ ಹೊಣೆಗಾರಿಕೆ ಏನು ದಸರಾ ಆಯೋಜನೆಯಲ್ಲಿ ಯಾವ ಸುಧಾರಣೆಗಳು ಅಗತ್ಯ ಆಡಳಿತಾತ್ಮಕ ಸಮನ್ವಯ ಹೇಗಿತ್ತು ಮತ್ತು ಮುಂದಿನ ದಿನಗಳಲ್ಲಿ ಯಾವ ಕ್ರಮಗಳನ್ನು ಕೈಗೊಳ್ಳಲಾಗುತ್ತದೆ ಎಂಬುದನ್ನು ಸಂಬಂಧಪಟ್ಟವರು ಸ್ಪಷ್ಟಪಡಿಸಬೇಕು.

ದಸರಾ ಮುಗಿದಿದೆ….ಖಾಲಿ ಉಳಿದ ಕೊಠಡಿಗಳಿಂದ ಆದಾಯ ಕಳೆದುಕೊಂಡ ಉದ್ಯಮಿಗಳ ಆತಂಕ ವ್ಯಾಪಾರ ಕುಸಿತದಿಂದ ಸಂಕಷ್ಟ ಎದುರಿಸುತ್ತಿರುವ ಸಣ್ಣ ವ್ಯಾಪಾರಿಗಳ ನೋವು ಮತ್ತು ಉದ್ಯೋಗದ ಅನಿಶ್ಚಿತತೆಯನ್ನು ಎದುರಿಸುತ್ತಿರುವ ಕಾರ್ಮಿಕ ಕುಟುಂಬಗಳ ಸಮಸ್ಯೆಗಳು ಇನ್ನೂ ಉಳಿದಿವೆ. ಹೀಗಿರುವಾಗ ಈ ವಿಚಾರವನ್ನು ಮರೆತು ಮುಂದುವರಿಯುವುದು ಪರಿಹಾರವಲ್ಲ ವ್ಯಾಪಾರಸ್ಥರ ಅಳಲಿಗೆ ಸ್ಪಂದಿಸಿ, ಕೊಡಗಿನ ಪ್ರವಾಸೋದ್ಯಮಕ್ಕೆ ಹೊಸ ಚೈತನ್ಯ ತುಂಬುವ ಕಾರ್ಯ ತಕ್ಷಣ ಆರಂಭವಾಗಬೇಕು.

ಕೊಡಗಿನ ದಸರಾ ಕೇವಲ ವೇದಿಕೆಯ ವೈಭವದಿಂದ ಯಶಸ್ವಿಯಾಗುವುದಿಲ್ಲ ಕೊಡಗಿನ ಜನರ ಬದುಕಿನಲ್ಲಿ ಆರ್ಥಿಕ ಚೈತನ್ಯ ಮೂಡಿದಾಗಲೇ ಅದರ ಯಶಸ್ಸು ಪರಿಪೂರ್ಣವಾಗುತ್ತದೆ. ಪ್ರವಾಸಿಗರ ಆಗಮನ ಹೆಚ್ಚಬೇಕು ಉದ್ಯಮಿಗಳ ವ್ಯಾಪಾರ ಚೇತರಿಸಿಕೊಳ್ಳಬೇಕು ಕಾರ್ಮಿಕರಿಗೆ ಉದ್ಯೋಗ ಭದ್ರತೆ ದೊರೆಯಬೇಕು ಮತ್ತು ಜಿಲ್ಲೆಯ ಆರ್ಥಿಕತೆ ಬಲಗೊಳ್ಳಬೇಕು.

ಈ ಎಲ್ಲಾ ಅಂಶಗಳನ್ನು ಗಂಭೀರವಾಗಿ ಪರಿಗಣಿಸಿ, ಕೊಡಗಿನ ಸಮಸ್ತ ವ್ಯಾಪಾರಸ್ಥರು ಮತ್ತು ಉದ್ಯಮಿಗಳೊಂದಿಗೆ ಚರ್ಚಿಸಿ ಈ ವರ್ಷದ ಪರಿಸ್ಥಿತಿಯ ಕುರಿತು ಸಮಗ್ರ ಪರಿಶೀಲನೆ ನಡೆಸಿ ಮುಂದಿನ ಪ್ರವಾಸಿ ಋತುಗಳಲ್ಲಿ ಇಂತಹ ಆತಂಕ ಮರುಕಳಿಸದಂತೆ ಪರಿಣಾಮಕಾರಿ ಕ್ರಮಗಳನ್ನು ಕೈಗೊಳ್ಳಬೇಕೆಂದು ಕೊಡಗು ಜನ ಅಭಿವೃದ್ಧಿ ಸಮಿತಿಯು ರಾಜ್ಯ ಸರ್ಕಾರ ಜಿಲ್ಲಾಡಳಿತ ಪ್ರವಾಸೋದ್ಯಮ ಇಲಾಖೆ ಮತ್ತು ಜಿಲ್ಲೆಯ ಜನಪ್ರತಿನಿಧಿಗಳನ್ನು ಬಲವಾಗಿ ಆಗ್ರಹಿಸುತ್ತದೆ.

ಕೊಡಗು ಜನ ಅಭಿವೃದ್ಧಿ ಸಮಿತಿ
ಕೊಡಗಿನ ಸಮಸ್ತ ವ್ಯಾಪಾರಸ್ಥರು ಉದ್ಯಮಿಗಳು ಕಾರ್ಮಿಕ ಕುಟುಂಬಗಳು ಮತ್ತು ಸಾರ್ವಜನಿಕ ಹಿತಾಸಕ್ತಿಯ ಪರವಾಗಿ
✍🏽 ಎಂ ಎಂ ದಾವುದ್